Gàidhlig / English
So-bhiadhta

So-bhiadhta

Air a sgrìobhadh le Kate air Diardaoin 19 An Céitein
’S ann a Nis ann an Eilean Leòdhais a thàinig abairt na seachdainse. Thathar ag ràdh ri duine no beathach sam bith a dh’ itheas dad sam bith a tha ri fhaotainn dhaibh: “chan fhaca mi beathach a riamh a bha cho so-bhiadhta ris.” Tha diofar ann, gè-ta, eadar duine aig a bheil sannt math airson biadh, agus cuideigin a tha direach sanntach! Tha mi air a chothrom a ghabhail an seo beagan abairtean a thoirt dhuibh aig a bheil ceangail ri sannt.

’S ann ann an Nis cuideachd a chanadh daoine: “ghabh e lumais air.” Tha seo a’ ciallachadh gun do ghabh e barrachd na bha ri fhaotainn dha, agus leis an sin, gun do ghoid e bho dhaoine eile. ’S e geòcair, no duine geòcach, a theirte ri chuideigin mar sin ann an Loch an Inbhir agus ann an Cùl-cinn. Cuimhnichibh air a’ chraos; ’s e seo fiamh air aodann duine a tha a’ cuartachadh bòrd làn de bhiadh. Anns na Hearadh, ’s e rèipeag a th’ ann an comharra sheòclaid, no, mar eiseimplair, sìlidh air bilean chloinne a dh’ innseas dhuibh gun robh iad gan lìonadh fhad ’s nach robh duine eile ann! Dh’ fhaodte gun cluinneadh sibh an abairt a leanas anns a’ Chomraich:

“Seall a’ rutas a th’ air an duine sin!”

Anns an dealachadh, tha fìor dheagh gnathas-chainnt agam dhuibh à Uidhist a Deas:

“Sannd na seachd sagart…”

’S e seo a fhreagradh sibh: “fear gun mhac, gun nighean!”

Ma tha sibh airson faclan no abairt a bharrachd a chur ris a’ chruinneachadh seo, nach biodh sibh cho math agus fios a chur thugainn gu h-ìseal.
 
Chaidh ur beachd a chur a-staigh gus sgrùdadh a dhèanamh air
Chan eil beachdan rim faotainn airson a’ phuist seo