Sgioba DASG

Sgioba aig an àm seo

An t-Ollamh Roibeard Ó Maolalaigh
Stiùiriche

Rugadh Rob(by) ann am Baile Àtha Cliath far an robh e na oileanach fo-cheumnach agus iar-cheumnach ann an Colaiste an Oilthighe Baile Àtha Cliath. Bhuilicheadh ceum PhD ann an Ceiltis air le Oilthigh Dhùn Èideann. Bha e na òraidiche ann an Colaiste an Oilthighe Baile Àtha Cliath agus Oilthigh Dhùn Èideann, agus na neach-rannsachaidh ann an Sgoil na Ceiltise, Institiud Àrd-Lèighinn Bhaile Àtha Cliath, far an robh e na Leas-Ollamh. Tha e air a bhith ag obair ann an Oilthigh Ghlaschu mar Ollamh na Gàidhlig bhon Fhaoilleach 2005 air adhart, agus chaidh ainmneachadh mar chiad Ollamh Stèidhichte na Gàidhlig anns a’ Ghilblean 2010. Stèidhich e am pròiseact Dachaigh airson Stòras na Gàidhlig ann an 2006 agus Corpas na Gàidhlig ann an 2008. Am measg nam pròiseactan didseatach anns an robh e an sàs gu ruige seo, tha: Leabhar-eòlas Cànanachas agus Litreachas na Gaeilge agus Muinntir na h-Alba anns na Meadhan-Aoisean 1093–1314. Faic an duileag aige an seo.

Stephen Barrett
Leasaiche Siostaman Teicneòlas Fiosrachaidh

Tha Stevie an urra ri goireasan eadar-lìn a chruthachadh is a ghleidheil airson DASG. Tha e air a bhith a obair mar neach-leasachaidh ann an teicneolas fiosrachaidh fad 18 bliadhna, agus e air làraichean-lìn agus siostaman a chruthachadh airson grunn bhuidhnean leithid Conservatoire Rìoghail na h-Alba, Oilthigh Carolina a Tuath aig Cnoc a’ Chaipeil, Ùghdarras Taigheadais Ghlaschu agus a’ Bhanca Ghearmailtich.
Garry Cooke
Neach-taic Corpais

IRugadh Garry ann an Glaschu agus thogadh e faisg air làimh ann an Cathair Ceann Tulaich ann an Siorrachd Dhùn Breatann an Ear. B’ ann aig Oilthigh Ghlaschu agus Sabhal Mòr Ostaig air an Eilean Sgitheanach a thog e a chuid Gàidhlig. Mus tàinig e air ais gu DASG, far an do dh’obraich e roimhe, bha e ag obair leis an sgioba aig a’ phròiseact ‘Faclair na Gàidhlig’. Nuair nach bi e an sàs ann an saoghal na Gàidhlig, bidh Garry air a bheò-ghlacadh le structar nam farpaisean ann am ball-coise proifeiseanta, cuspair mun do sgrìobh e tòrr thar nam bliadhnaichean.