- Amasan DASG
- Mu Chorpas na Gàidhlig
- Mu Fhaclan bhon t-Sluagh
- Mar a bheirear iomradh
- Eachdraidh
- Faclair Eachdraidheil na Gàidhlig (FEG)
- Sgioba DASG
- Bòrd Comhairleachaidh
- Foillseachaidhean
- Taing
- Dòighean gus cuideachadh
- Dlighe-sgrìobhaidh
- Riaghailtean Cleachdaidh
- Cuir Fios Thugainn
- Cainnt anns na Ceathramhan
- Am Briathradan
- LEACAN
- DASG Launch
- Gairm Air-loidhne
Caoran-mhiagan
Ma tha sibh air a bhith mun cuairt anns an t-sìde bhrèagha a tha air a bhith ann as t-fhoghar seo, is dòcha gu bheil sibh air caoran-mhiagan fhaicinn. Is iad smeuran a bhios a’ fàs air bàrr fraoich aig an àm seo den bhliadhna a ghabhas ithe (‘stone brambles’ sa Bheurla), a rèir neach-labhairt à Gearradh na Monaidh, ann an Uibhist a Deas. Bha facal eile airson smeuran a bhiodh a’ fàs a-measg fraoich air a thoirt seachad le luchd-labhairt ann an Eilean Leòdhais cho math ris na Hearadh: curra-mhidheag no corra-mhidheag. Tha corra-mheagan ann an Dwelly, ach is e ‘bilberry’ no ‘whortleberry’ a bu chiallta anns an fhaclair sin.
Thàinig ainm eile airson na smeura seo bho Ghearradh na Monaidh: corraiche fiach. Is dòcha gu bheil fiach an seo ceangailte ri ‘fiacal’ no ‘geur-fhiaclach’, leis gu bheil tòrr bioran beaga air na lusan a tha seo.
Anns an leabhar air a bheil an tiotal Gaelic Names of Plants le Iain Camshron, is e sùbh nam ban-sìthe an th’ air an smeur seo – ainm air leth tarraingeach! Tha seo a’ nochdadh ann an Dwelly cuideachd, ri taobh sùbh nam ban-mìn agus caora bada-miann. Tha an t-ainm seo a’ nochdadh ann an leabhar Chamshroin cuideachd, leis a’ mhìneachadh: ‘the berry of the desirable cluster.’
Gun teagamh sam bith, bhiodh na smeuran dearga seo a’ coimhead air leth tarraingeach as t-fhoghar. Ma tha sibh air am faicinn, no ma tha sibh eòlach air ainmean eile air an son, nach leig sibh fios thugainn air Facebook no Twitter.
Chan eil beachdan rim faotainn airson a’ phuist seo