Gàidhlig / English
An Glutadh

An Glutadh

Air a sgrìobhadh le Shelagh air Diardaoin 3 an t-Sultain 2015

Ma tha sibh am beachd taigh a thogail san àm ri teachd, ’s dòcha gum bi facal na seachdain-sa feumail dhuibh: an glutadh, gainmheach no talamh a bhiodhte a’ cur eadar dà bhalla, mar a tha Ailean Boyd a’ mìneachadh anns an leabhar aige, Seann Taighean Tirisdeach (1986), a tha ann an Corpus na Gàidhlig:

Bha an taigh air a thogail le dà bhalla-cloiche (am balla-staigh agus am balla-mach) a bha suidhichte eadar dà throigh agus trì troighean o chèile, agus a ' ruith còmhla.

Bha na bha eatarra air a lìonadh gu teann le gainmhich no le talamh am broinn a’ bhalla fhèin , agus ' s e an glutadh a theirte ris a seo.

Chaidh am facal a chruinneachadh airson ‘Faclan Bhon t-Sluagh’ ann an Leòdhas agus Barraigh, agus thug an neach-labhairt ann am Barraigh seachad tòimhseachan a tha ceangailte ris:

Chan eil e muigh ’s chan eil e stigh ’s cha tig an taigh às aonais.

Bha neach-labhairt eile ann an Leòdhas a bhiodh a’ cleachdadh glutradh anns an t-seagh seo, agus bha glutadh a’ ciallachadh ‘sediment in a drain.. Bha litreachadh eile aca ann am Beàrnaraigh na Hearadh cuideachd: glutranadh.

A rèir faclair mòr Dwelly, tha an glutadh a’ tighinn bho glut-lìonadh agus is e gnìomhar a th’ ann cuideachd: a’ glutadh neo a’ glut-lìonadh. Tha glutadh cuideachd a’ ciallachadh ‘eating to excess’ neo ‘gulping noisily,’ is e ceangailte ris an fhacal Bheurla ‘gluttony.’

An do chleachd sibh an glutadh a-riamh ann an togalach sam bith? Nach leig sibh fios thugainn air Facebook no Twitter.

Chaidh ur beachd a chur a-staigh gus sgrùdadh a dhèanamh air
Chan eil beachdan rim faotainn airson a’ phuist seo