Gàidhlig / English
Scuidsearachd

Scuidsearachd

Air a sgrìobhadh le Shelagh air Diardaoin 26 am Màrt 2015

Chaidh am facal scuidsearachd a chruinneachadh ann an Uibhist a Tuath agus bhiodhte a chleachdadh nuair a bha cuideigin a’ dèanamh obair-taighe ann an dòigh bìdeagach – mar a theirte sa Bheurla, ‘guddling’ no ‘messing about’. Is e an eisimpleir a tha air a thoirt seachad: “Bha mi a’ scuidsearachd aig tì.”

A rèir an duine on fhuaradh am facal, tha scuidsearachd coltach ri luidreadh, a tha air làrach-lìn DASG cuideachd, agus a chaidh a chruinneachadh ann an Uibhist a Deas. Tha luidreadh air a chleachdadh ann an dà sheagh “messing about as in a child playing in soap suds” agus “being tossed about whilst on a boat” (“Bha mi air mo luidreadh a’ tighinn air a’ bhàta.”)

Chìthear luidreadh air a chleachdadh anns a’ chiad seagh ann an ‘Òran do Chaora’ ann an Òrain Dhonnchaidh Bhàin:

Té ri bùrn, is té ri mòinidh,
Té ag cur seòl air an ainneal;
Té 'ga phostadh ann an tuba,
Té 'ga luidreadh, té 'ga ghlanadh;

Tha am facal air a chleachdadh anns an dàrna seagh ann an An Cath Spioradail le Lorenzo Scupoli, air a thionndadh gu Gàidhlig le Eoghan MacEachainn ann an 1835:

…tha e a’ càrnadh suas peacaidh air muin peacaidh, is ga chruadhachadh fhein anns an olc. Mar sin tha e ga luidreadh fhein san eabar, a’ tuiteam o dhorchadas, gu dorchadas, o shloc gu sloc, an sior dhol nas fhaid’ o rathad an t-sàbhalaidh, agus an sior mhìreadh ciont’ air cionta, nas lagha na thèid a thiarnadh le gràsan sonraichhte.

A bheil sibhse eòlach air an dà fhacal seo scuidsearachd no luidreadh? Ma tha, nach leig sibh fios thugainn air Facebook no Twitter?

Chaidh ur beachd a chur a-staigh gus sgrùdadh a dhèanamh air
Chan eil beachdan rim faotainn airson a’ phuist seo