DASG Blog

Saobh-Chràbhaidhean Tachais

Aon latha, bha mi ’s mo bhràmair a’ tilleadh air ais bho bùithtean ’s a’ coiseachd sìos sraid trang ann am Baile Ùir Dhùn Èideann nuair a theab i tuiteam. Le sin, chuala mi aice gun coinnich i ri duine. Chunnaic i nach do thuig mi agus dh’inns i dhomh gum biodh i a’ coinneachadh ri boireannach nan tuiteadh i air a cas chlì.

Ma tha sibh fhathast ann an imcheist, bha i a’ bruidhinn air saobh-chràbhadh a dh’ionnsaich a màthair dhi nuair a bha i òg anns a’ Phòlainn. A bharrachd air sin, dh’inns i fìr eile dhomh mu bhasan an tachas. Thuirteadh gum bi cuideigin a’ faighinn airgead ma bhios tachas air a bhas chlì aige agus bheir e air làimh chuideigin ma bhios tachas air a bhas dheas.

Tha mi gu math measail air na saobh-cràbhaidhean siud air sgàth ’s gum bi iad a’ toirt mìneachadh gu math às an àbhaist air dèirichean ’s faireachaidhean tiotain 's àbhaisteach. Tha iomadh saobh-cràbhadh aig na Gàidheil mun droch-shùil agus ’s toil leam an cleachdadh anns an can daoine “Dia gad ghleidheadh” ri bà-bainne nuair a thèid iad seachad orra gus buaidh na droch-shùla a sheachnadh ach tha mòran saobh-cràbhaidhean inntinneach aca cuideachd mu thachas 's faireachaidhean làitheil.

Ged a thuirteadh ann am Beurla gum bi do chluasan “air an losgadh” nuair a tha cuideigin a’ bruidhinn ort, tha ciall beagan nas tointe air cluasan teotha ann am beul-aithris na Gàidhlig. Canar gu bheil duine a’ toirt moladh dhut ma bhios do chluas dheas a’ fàs teth ach bidh do chluas chlì a’ fàs teth ma bhios e a’ càineadh ort. Gu ruige seo, chan fhaca mi eisimpleir ann am Faclan bhon t-Sluaigh a dh’innseas dhomh ciamar a bu chòir dhuinn ciallachadh a thoirt às am bi dà chluas theth ort. A bheil fios agaibhse?

Ma nochdas tachas air do shròn, tuigear às gu bheil cuideigin eile a’ smaoineachadh ort. ’S e “meanmhainn” a thugadh air am faireachdainn seo. Fhad ’s fhios dhomh, cha bhi an tachas seo a’ sealltainn dhut co-dhiù ’s bidh no nach bi na smuaintean seo còir. A-rèir an fhiosrachaidh gu h-àrd, ma bhios tu airson faighinn a-mach ’s math dh’fhaoidte gum feum thu tomhas a dhèanamh air dè cho teth ’s a bhios do chluasan. Chuala mi cuideachd gum bu chòir dùil a bhith agad ris am faigh litir ma bhios tu a’ mothachadh tachas anns nad chuinnean. 'S e mearmin an t-ainm a th' air am faireachdainn seo. Gu mi-fhortanach, cha eil an t-eòlas agam far a bheil an tachas ort nuair a chuireas post-dealain thugad.

Aig deireadh an latha, faodaidh tu frog a thogail ort nam biodh tachas a’ nochdadh air no os chionn do bhile uachdair. ’S e sgrìob drama an t-ainm a th’ air an tachas seo agus bidh e ag innse dhut gum faigh thu drama gun fhiughar o chuideign eile. 

A bheil thu fhèin eòlach air saobh-chràbhadh sam bith nach eil ann am Faclan bhon t-Sluaigh, gu h-àraid feadhainn air tachas air choireigin? Ma tha, nach leigibh fios thugainn?

Facebook: https://www.facebook.com/DasgGlaschu
Twitter: https://twitter.com/DASG_Glaschu