Gàidhlig / English
Pollag na Samhna

Pollag na Samhna

Air a sgrìobhadh le Shelagh air 27 an Dàmhair 2014

Fàilte gu blog DASG, far am bithear a’ toirt sùil air facal no abairt gach seachdain bho ‘Faclan bhon t-Sluagh’, cruinneachadh de dh’ fhiosrachadh a chaigh fhaighinn bhon t-sluagh bho air feadh sgìrean Gàidhealach an h-Alba agus Alba Nuadh eadar na 1960an agus na 1980an.

Tha a’ chiad abairt againn air leth freagarrach airson an ama seo den bhliadhna: Pollag na Samhna (a thàinig bho Roderick O’Henley ann an Uibhist a Deas).

Is e a th’ ann am pollag na Shamhna toll a chaidh a dheanamh san talamh air Oidhche Shamhna, leis an gabhadh na bha an dàn do dhuine a innse. Nan robh biastag san toll an ath latha, bhiodh sibh fortanach, ach mura robh càil sam bith san toll, is e comharra mì-fhortain a bhiodh ann.

Tha cunntas air cleachdaidhean eile mu Oidhche Shamhna, a tha ceangailte ri fortan seach na taibhsean agus na uile-bhèistean air a bheil sinn eòlach an-diugh ri leughadh ann an Nach Neònach Sin, le Cailein T. MacCoinnich. A rèir an sgeòil, bha dà dhoigh ann an Taransaigh a dh’fhaodadh caileagan fhaighinn a-mach cuin is cò a phòsadh iad:

i) Dheidheadh a’ chaileag a-steach dhan t-sabhal agus siaman connlaich a thilgeadh suas chun lobhta. Nam fairicheadh i cuideigin a’ tarraing air an t-siamain, dh’ èigheadh i “Cò thusa sud air ceann mo shiamain?” ’S guth an fhir a bha i gu pòsadh a fhreagradh i, agus, nan robh i fortanach, chìtheadh i coltas an fhir a’ coimhead sios orra bhon lobhta.

ii) Dheidheadh a’ chaileag dhan iodhlan, le bonn airgid ’na làimh ’s dheidheadh i trì tursan timcheall aon de na cruachan arbhair. Nan robh i a’ dol a phòsadh, chìtheadh i “a taghadh ’s a roghainn de fhearaibh an domhain” a’ coimhead oirre timcheall na cruaiche.

’S dòcha gum biodh na dòighean seo na bu shoirbheachaile na bhith a’ lorg leannain air-loidhne!

Ma tha thu eòlach air faclan no gnàthsan-cainnt neo-chumanta eile a tha ceangailte ri Oidhche Shamhna, air no cleachdaidhean dualchasach Albannach air Oidhche Shamhna, bhiodh ùidh mhor againn an cluinntinn tro na cunntasan Twitter is Facebook againn: @DASG_Glaschu / facebook.com/DasgGlaschu.

Chaidh ur beachd a chur a-staigh gus sgrùdadh a dhèanamh air
Chan eil beachdan rim faotainn airson a’ phuist seo