DASG Blog

Grioglachan

Grioglachan

Thoiribh sùil don iarmailt os ur cionn gus am facal a lorg an t-seachdain-sa!’S e “Pleiades,” neo “the Seven Sisters” a th’ anns a’ Ghrioglachan.

Chuir tè dhen luchd-leughaidh fios thugainn le ainm eile air an son: Sruth Ghoraidh Chròbain, agus gur e siud a bh’ aca air an Eilean Mhanain. Tha ceangal aig Goraidh Chròbain ri Ìle, is e ri radh gu bheil e air a thiodhlaigeadh faisg air Ceanntragh.

Chaidh am facal a chlàradh anns na Hearadh agus b’ e siud a t-ainm a bh’ aig Donnachadh M. Conall à Taigh an Uillt, anns an leabhar aige:“Reul-eolais.” Tha Conall ga mhìneachadh còmhla ris a’ Chrann Arain, neo Slat-tomhais. Sgrìobh e gum faic sinn “Grunnan neo Grioglachan nan Seachd-Rionnag.” Donnchadh M Conall, Reul-Eolais, td. 25. ’S e th’ ann an grioglachan buidheann de rudan beaga, mar rionnagan. Tha seo a’ toirt dhuinn beachd gur e ‘cruinneachadh’ a tha air cùlaibh ciall an fhacail seo.Gu dearbh, tha ciall an ainm a’ tighinn am follais anns na duileagan mu dheireadh de Reul-eolais: “Tha na rionnagan air an roinn a mach le reultairibh o cheann uine mhòr a nis ’nan grioglachanaibh, no grunnanaibh, leis am bheil iad air an comharrachadh agus air an aithneachadh;…”Donnachadh M. Conall, Reul-Eolais,td,121.

Anns an Ogha Mhòr, tha dealbh taitneach air a dheanamh dhuinn dhen Grioglachan ann an co-sheirm ri nàdar na talmhainn. Bha a’ Ghrioglachan: “priobach an sid a’ caithris; is e trang ag àireamh triall nan anam a fhuair crioch an dàin roi’n mhithich.” Aonghas MacDhonnachaidh, An t-Ogha Mòr,td.138

Cluinnidh sibh cuideachd gu bheil na Grioglachan air nochdadh ann an òrain nan Gàidheal. Chuir neach-leughaidh eile òran thugainn.: Òran a’ Ghrioglachain.

’S e Sgriob Chlann Uisnich a chleachdadh cuid eile airson am “Milky Way”. Tha an t-ainm seo a’ tighinn bho ùr-sgeul mu dheidhinn Deirdre agus Chlann Uisnich. Tha an naidheachd ag innse mar a dh’ fhàs anaman a' Chlann mar chraobhan air na h-uaighean aca. Dh’ fheuch rìgh olc ri chur às dhaibh, le bhith gan leigeil agus gan tiodhlaiceagh ann an diofar àitean. Theich iad a dh' fhuireach mar sgrìob bhàin de rionnagan a chì sibh air oidhche soilleir.

Tha sinn airson taing mhòr a thoirt do na daoine a chuir fios thugainn mu dheidhinn blog na seachdainne.Nach innis sibh dhuinn mu dheidhinn sealladh air leth àlainn a chunnaic sibh dhe Na Grioglachan, An Sgriob Chlann Uisnich neo gu dearbh, miorbhuil sam bith eile san iarmailt, air Facebook neo Twitter.