Seann-Òran Seilge

GF307i04 SEANN-ÒRAN SEILGE

Beulaiche: Tormad Pheadair Ruairidh 'Illeasbuig | Norman MacLean

[Séist:] Seinn iuro bhìnn ó,
Chall eille ho rò ho,
Seinn iuro bhìnn ó,
Eille o ho ro hi.

Gura buidheach mi m' chéile,
Thug an gunn' ás Dùn Éideann,
Dhomhsa b' aithne do bheusan,
'S cha bu léir dhomh do ghiamh.

Gura buidheach mi m' chéile,
Thug an gunn' ás Dùn Éideann,
Dhomhsa b' aithne do bheusan,
'S cha bu léir dhomh do ghiamh.

Ach toil leam àiridh nam badan,
Far am b' éibhinn leam cadal,
'S am biodh fasgadh ri gaillionn,
Aig aighean 's aig laoigh.

Ach frith nan damh donna,
'S nan ceannardan troma,
Leam bu mhiann dol 'n an coinneamh,
Nuair a chromadh a' ghrian.

Le 'm chuilbheir caol cùbhraidh,
Nam achlais 'ga giùlan,
Luaidh ghlas air h-ùrlar,
Bheir tuill ùr air am bian.

Spor thana gheur dhù-ghorm,
'N déigh a glasadh 's a dlùthadh,
'Chuireadh sradag ri fùdar,
Nuair a lùbainn mo mhiar.