Òran na Bainnseadh

GF286i06 ÒRAN NA BAINNSEADH (CUINGICHTE)

Beulaiche: John Dan Nìll Mac na Bantraich | John Dan MacNeil
Bàrd: Catherine MacNeil | Bean Mhìcheil Steaphainn , Catrìona NicNìll

Chaidh an t-òran seo a dheànamh do dhuine a bha mu dheich bliadhna fichead -- ma trì fichead bliadhna. Agus -- dha 'n bhean na bainnseadh aige, bha i deich bliadhna fichead a dh'aois nuair a thachair seo. Agus b'fheudar dha pòsadh air tàilleabh. Bha leanabh dol a bhith aice bhuaith, is chaidh a' sagairt as a dheaghaidh airson a pòsadh. Agus ghabh bana-charaid dhi, ghabh i gu math dona an naidheachd a chuala i agus rinn i an t-òran mu dheidhinn an duine seo. Bha e pòsda dà thuras roimhe siud. Bha e air a bhith na bhanntraich an dàrna turas agus chan eil chuimhn' a'm dé na bh'aige do theaghlach. Bha teaghlach mór aige o'n dà bhean, co-dhiù. Agus a' chiad chàr -- bha na càraichean gann anns an àm -- a' chiad chàr a's an deachaidh 'ad airson a dhol a phòsadh, a dhol gu 'n eaglais, a dhol a phòsadh -- chaidh e le banc' a' rathaid agus gu mìorailteacha, cha deachaidh gin ac' a ghoirteachadh. Agus chaidh an uair sin fios a chuir air càr eile. Agus an càr eile -- bha trì chàraichean ann uile gu léir air a' phòsadh. Agus an càr -- an dàrna càr, 'se 'n càr a bha 'sa mheadhan a th' air ainmeachas anns an òran -- mharbh e cearc aig fear dha na nàbaidhean air a' rathad a' dol gu 'n eaglais. Agus an treas càr, 's e fear còigreach eile a thug air ais e, is bha sin uileag a's a -- ann an ceathramhan an òrain.

[Séist]: O, teann, teann a' bhodaich,
O, teann, teann, teann a' bhodaich,
Teann is fuirich thall a' bhodaich,
Is na bi 'tighinn a chogadh orm

Fear a tha dol a phòsadh a-màireach
Fios aig gach neach mar tha e
Liuthach duine deug do phàistean
Aig an tràill nuair bha e òg

Gum b' fheàrr leam a bhith gun duine
Mur b' urrainn dhomh fhín fuireach
Na bhith 'coimhead 's e na ghurrab
'Nuair bha e 'cur na h-ighinn òg

Mun d' thàinig na sia uairean
Gun robh àsan ann an cruadal
Chaidh 'n càr air an uachdair
Tha e fuathasach 'ad bhith beò

Gur e 'n càr a bha 'sa mheadhan
Chuir gach creutair gu clisteadh
Dh'fhalbh na cearcan far na spiris
'S ann am mionaid rinn e feòl

Cha b'e 'n càr a thug gu cal' thu
Cha b'e idir thug air ais thu
Ach eil' an fhortan is tha e na fhortan
Gun do choisinn e gu leòr

'S ann a chunna culaidh-eagail
Mar gum biodh sibh air na creagan
'S mise nach rachadh nam bhreislich
Ged nach seasadh sibh nam chòir

'S e honeymoon a thug dhaibh gluasad
Gun do ghabh 'ad suas an suampa
Far a' robh gu leòr do luachair
'S air a chuairteachadh le lòin

Sin na tha cuimhne agam-sa air.