Leis a' Mhaighdeann

LEIS A' MHAIGHDEANN

Beulaiche: Iain Dhòmhnaill Iain Lachlainn | John Alex MacEachern

[Séist]: Leis a' Mhaighdeann, o hao,
Leis a' Mhaighdeann, o ro,
Beul an anmoich, o hao,
Rinn sinn falbh leath' fo sheòl.

Seo an geamhradh, o hao,
Rinn an call oirnn, o ro,
Soitheach Frangach, o hao,
Chaidh air chall far Ceap George.

'S ann DiLuain ann, o hao,
Rinn sinn gluasad, o ro,
Feadh nan cuaintean, o hao,
Thug sinn uaislean air bòrd.

Thuirt mo mhàthair, o hao,
'S truagh a tha mi, o ro,
Tha mo chàirdean, o hao,
'S fhear no dhà dhiubh air bòrd.

Seachad aoibhneas, o hao,
Am beul na h-oidhcheadh, o ro,
Las sinn coinnlean, o hao,
Chuir a chombaist air dòigh.

'S bha i 'séideadh, o hao,
An fhairg' ag éirigh, o ro,
Cha bu léir dhuinn, o hao,
Nì fo 'n gréin ach na neòil.

'S bha i 'g aoidion, o hao,
Mu 'n chrann-thosich, o ro,
Fhir 'ga taomadh, o hao,
Gillean sgairteil air bòrd.

'S thuirt a' sgiobair, o hao,
Ri chuid ghillean, o ro,
Glacaibh misneach, o hao,
'S cuiribh riof a's an t-seòl.

Riof 's an topsail, o hao,
'Deànamh snòg i, o ro,
Bithibh faiceallach, o hao
Nach tig dosgainn 'nar còir.

Seachad Àros, o hao,
Bha i gàbhaidh, o ro,
Ceann Loch Àlainn o hao,
Chuir sinn càbull fo sròin.