Eachann Dòimhgein agus na Casan Reòite

GF200i08 EACHANN DÒIMHGEIN AGUS NA CASAN REÒITE

Beulaiche: Dòmhnaill 'Illeasbuig mac Aonghais 'ic Alasdair | Dan Allan Gillis
Tar-Sgrìobhadh le: Oighrig NicFhraing | Effie Rankin

[Dan Allan Gillis:] Ghabh iad suaineach oidhche agus chaidh ia—dh'èirich cliobaist air choireigin dhaibh 's reoth na casan aige dona. Thàinig e sin a-nuas gu Camp Hill agus bha e staigh an sin—o bha e mu thrì mìosan ann. Ach bha coimhearsnach de dh'Aonghas a bhràthair a New Waterford ann—fear a dh'fhaighnicheadh barrachd cheistean 's a dh'fhaighnicheadh fear a bhiodh a' cur nan ceistean ort, 's chaidh e staigh 's dh'fhaighnich e do dh'Eachann, "Ach Eachainn, ciamar a thachair seo dhut?" "Innsidh mise dhut, Aonghais, innsidh mise dhut ciamar a thachair seo. Shìos an Inverness-tha 'ad—creidmhich uamhasach ann, agus gu h-àraid aig Nollaig. Agus Oidhche Nollaig, tha 'n dà eaglais—an eaglais Phròstanach agus an Eaglais Chaitligeach—tha iad cho làn 's nach fhaigh thu staigh air an doras. Bha mise Oidhche Nollaig a' gabhail deochan 's bha mi anmoch a ruighinn suas 's dar a ràinig mi, cha robh agam ach mo ghlùinean a-staigh 's mo chasan a-mach. Nuair a bha 'n aifhrionn seachad, bha na casan agam reòite. Shin mar a dh'èirich dhòmhsa!"