Rinn mi còrr is naoi mìle

GF018i03 RINN MI CÒRR IS NAOI MÌLE

Beulaiche: Dòmhnall Nìll Eòin Mhóir | Dan Neil MacNeil

Rinn mi còrr is naoi mìle,
Anns an tìr 's gun mi eòlach;
A' dol a shealltainn na gruagaich,
A bh' air a' bhuailidh na h-ònar.

A' dol a shealltainn na gruagaich,
A bh' air a' bhuailidh na h-ònar;
Nuair a ràna' mi 'm baile,
Cha robh 'ad mar bu chòir dhaibh.

Nuair a ràna' mi 'm baile,
Cha robh 'ad 's mar bu chòir dhaibh;
Cha robh àit air luchd-ciùil ann,
'S cha robh saod air luchd-òil ann.

Cha robh àit air luchd-ciùil ann,
Cha robh saod air luchd-òil ann;
Gu robh mnathan a' fuaigheal,
Agus gruagaichean brònach.

Gu robh mnathan a' fuaigheal,
Agus gruagaichean brònach;
'S ann a fhuair mi [cruth?] ighinn òg,
'S i 'na sìneadh 'san t-seòmbar.

'S ann a fhuair mi [chruth?] [fhìnealt'/ighinn òg?],
'S i 'na sìneadh 'san t-seòmbar;
'S i 'na sìneadh 'fon uinneag,
Far nach cluinn mi do chòmhradh.

'S i 'na sìneadh fon uinneig,
Far nach cluinn mi do chòmhradh;
'S daor a cheannaich mi 'n trusgan.
Tha air a thrusadh mu d' dhòrnan.

Daor a cheannaich mi 'n trusgan,
A th'air a thrusadh mu d' dhòrnan;
Gu bheil snigh' air mo ghruaidhean,
A' sìor bhualadh mo bhrògan.

Seo agaibh Dòmhnall MacNìll, tha e trì fichead 's a h-aon deug a dh'aois a' gabhail an òrain seo.