GF068i01 AN OIDHCHE BHA BANAIS AN TAIGH CHOINNICH DHUINN



Beulaiche: Danaidh Dhòmhnaill Bhàin | Danny MacDonald



An oidhche bha a' bhanais an taigh Choinnich dhuinn, 
A chunnaic mi 'chaileag, bha i ealanta, grinn,
Dhannsadh i loinneil is sheinneadh i binn,
Bha mise mu coinneamh a' togail an fhuinn.



Bha a gruaidh mar na ròsan cho bòidheach 's cho mìn,
Falt buidhe mar òr oirr' a shuaineas a' chìr,
Bha mise fo m' anail a' cantainn rium fhín,
'S e aingeal air thalamh th' ann an Anna NicCuinn.



Fhuair mi a-mach i à fasgadh an taoim, 
Bha solas na gealach cho glan os ar cinn,
Thug mi dhi gealladh mun rachainn dha 'n choill', 
Gum biodh i bho'n a' Challainn 'na bean agam fhìn.



Chùm mi mo ghealladh ri Anna NicCuinn,
Mus d' thàinig a' Challainn bha ise 'na mnaoi;
Chan eil i cho maiseach no idir cho binn, 
'S a bha i mu mo choinneamh an taigh Choinnich dhuinn!



An àm éirigh 's a' mhadainn bidh Anna cho tinn, 
Cha tig i á leabaidh gu faigh i 'cuid tì, 
Suidhidh i tacan a' tachais a cinn, 
'S ma chanas mi facal bidh bat' air mo dhruim.



Ma labhras mi duineil 'ga cumail fo chìs, 
Chan eil annam ach burraidh is duine gun bhrìgh;
Mu choinneamh gach facail tha aicese trì;
Chan eil fàilleach 'san teang' aig a' bhean agam fhìn.



An dé bha i carran [carraid?] ri bean Iain 'ic Aoidh, 
Thug Anna dhi mullach a' churrac le sgrìob;
Tha plàigh 'na mo thall' ach chan abair mi bìd, 
'S cha chòir dhomh 'bhi 'gearan mu 'n a bhean agam fhìn.



Ach bheirinn mar chomhairl' air balaich na tìr'
'S nuair a bhios iad air banais is drama 'nan cinn:
Na tugadh iad gealladh do chaileag a chaoidh, 
Gun fhios no gun aithne [cuid/có ás?] no có i.



Shin agad Anna NicCuinn.