Ruairidh MacIllEathain

*Ruairidh MacIllEathain is a well-known Gaelic broadcaster with a particular interest in Gaelic learners. He is attending Ceòlas for the first time. He talks about the quality of the instruction in his chosen subjects, and assesses the value of the school for learners of Gaelic.*

Is mise Ruairidh MacIllEathain, agus tha mi an sàs gu mòr ann an obair a thaobh ionnsachadh na Gàidhlig, is a’ frithealadh luchd-ionnsachaidh ann an diofar dhòighean. Agus feumaidh mi ràdh gu bheil an fhèis seo, Ceòlas, a’ còrdadh rium gu mòr, oir tha measgachadh math ann de dhaoine a tha fileanta bho thùs, no daoine aig – a tha ag ionnsachadh na Gàidhlig aig diofar ìrean – daoine a tha dìreach aig toiseach tòiseachaidh – agus mar sin ’s e rud gu math fallain a th’ ann, na diofar sheòrsaichean de dhaoine sin a bhith am measg a chèile.

Tha mi air a bhith a’ dèanamh dannsa-ceum. ’S dòcha gun dèan mi dannsa air choreigin eile cuideachd, agus seinn a bharrachd air sin. Agus tha an dannsa-ceum gu math làidir à Ceap Breatann. An tè a th’ air a bhith a’ teagasg anns a’ chlas agam, thogadh i ann an Ceap Breatann an toiseach. Tha i a-nis ann an Alba, ’s tha Gàidhlig bhrèagha aice. Ach tha sin uabhasach inntinneach dhomh, na ceanglaichean a th’ ann aig Ceòlas eadar an dà dhùthaich, mar gum biodh, Ghàidhealach – Ceap Breatann agus Uibhist a Deas – ’s tha sin gu math, gu math cruthachail, an dòigh sa bheil e ag obair.

Tha Cathy-Ann Nic a’ Phì a’ teagasg anns a’ chlas agamsa, agus ’s fhìor thoil leam an guth aice. Tha CDs agam aig an taigh, ’s tha e uabhasach math a bhith còmhla rithe, ag èisteachd rithe a’ seinn, agus a bhith ag ionnsachadh rud no dhà bhuaipe.

Mholainn an fhèis seo gu mòr do dhaoine aig a bheil ùidh ann a bhith ag ionnsachadh na Gàidhlig, gu h-àraidh an fheadhainn a tha ag iarraidh a bhith fileanta, oir – ann an dà dhòigh – thig iad gu fèis far a bheil a’ Ghàidhlig ann am follais, agus tha sin glè mhath, ’s gheibh iad brosnachadh ann an seo. Tha clasaichean a’ dol, tha a h-uile duine a’ dèanamh Gàidhlig gu ìre air choreigin. A bharrachd air an sin, tha e stèidhichte ’s suidhichte ann an Uibhist a Deas, agus chan eil, ’s dòcha, àite nas Gàidhealaiche ann an Alba an-diugh na seo. Tha daoine gu math deònach an cànan a bhruidhinn anns a’ choimhearsnachd, anns na bùthan, anns na taighean-seinnse, aig na cèilidhean, agus tha deagh chothrom aig luchd-ionnsachaidh an cànan, beagan no mòran a dh’ionnsaich iad, a chur gu feum anns a’ choimhearsnachd.